如果唔系有濕地公園, 我諗都無乜游客會去元朗, 呢個位於香港西北面的小市鎮, 因為實在太偏僻! 作為一個香港人, 我都極少去元朗, 起碼超過5年無去過, 今次為去濕地去園而重踏元朗! 關於濕地公園, 大家可以去www.wetlandpark.com 查查元朗雖小, 但除濕地公園外亦有其它景點, 有興趣可去www.yl.hk看看濕地公園位置偏僻, 交通不便, 住港島最好到金鐘坐大巴967, 如果住九龍, 可以參考一下本人的線路:因為手上有一張九鐵一日無限乘車票(價值$30, 任可東鐵站都可買到), 所以全程坐九鐵公司o既車, 從沙田出發, 先坐東鐵去尖東, 轉巴士k16去南昌, 然後西鐵去元朗, 再轉輕鐵去第一站: B仔涼粉 (www.yl.hk/b, 輕鐵康樂路站下車, 沿大坑渠走5分鐘便到, 如果直接去濕地公園, 西鐵去天水圍站轉輕鐵便可)山長水遠入到元朗, 當然唔可以淨去濕地公園咁浪費, 要試一試元朗最出名o既B仔涼粉! B仔涼粉(佳記)曾經是元朗最出名最好食的甜品店, 但近年質素己下降, 所以都無乜期望, 只不過是路過元朗順便一試! 叫o左個腸粉同鮮雜果黑珍珠, 腸粉只要$5, 好多醬, 幾好, 黑珍珠因為選o左較貴o既鮮雜果, 有士多啤梨, 密瓜, 火龍果, 芒果, 都幾足料, 唔錯, 不過$28貴o左d! 但B仔個環境好唔得, 首先個鋪位系條大明渠隔離, 已經系先天不足, d人客食完o既碗只系放落門口個大紅色膠桶, 無遮無掩, 所以店內有蚊同烏蠅, 真系唔多掂!所謂B仔涼仔, 只系超大盆同多生果, 賣$60, 我只系一個人,當然無叫, 但如果有3-4人可以考慮share, 佢個餐牌超多選擇, 睇到人花多眼亂, 但個人認為環境同質素滿記好好多!之後繼續坐輕鐵去濕地公園, 第一站系去探探鱷魚’貝貝’, 呢只鱷魚系香港真系出曬名, 唔知點樣無端端去o左香港o既山貝河生活, 俾人發現後, 因為鱷魚始終有危險, 但又唔想殺佢, 香港政府就系澳洲同大陸請專家o黎活捉, 點知攪o左幾個月, 日日上頭紙, 都未捉到, 最後兩位專家都放棄走埋, 反而意外地俾個漁民捉到! 之後仲要公開網上征名, 先幫佢改o左’貝貝’呢個名, 仲系濕地公園預留間大屋俾佢! 但可能天氣熱, 貝貝只系掛住訓, 唔理大量o黎探佢o既市民, 一於只系用個背脊向住大家!跟住系行小橋, 慢慢睇到濕地點形成, 沿途有好多植物, 各類花草樹木, 有紅樹林, 亦有小生物如蟹, 還有浮橋, 都幾好玩! 沿途有很多觀鳥的地方, 可以看到黑臉皮鷺, 小白鷺等, 遠望過去還可以看到深圳!最後回到室內展覽廳, 可以看看介紹大自然的短片(每30分鐘一場), 亦有兩個展館, 還面有很多計算機游戲, 可以了解大自然, 亦可以看看綠海龜! 總之去濕地公園感覺唔錯, 是一個郊游o既好去處, 如果一家人帶小朋友去行下, 教佢認識大自然, 真系一個唔錯o既選擇! 回程之前再去埋另一間叫甜心鮮果園o既甜品店(www.yl.hk/sh, 輕鐵豐年路站或西鐵朗屏站, 沿天橋走5分鐘), 佢個餐牌又好似B仔咁超多選擇, 都唔知系咪元朗o既甜品店都系咁o既! 呢間o野出名食抄冰, 所謂抄冰, 系將一杯果汁放落個冷擭度抄, 抄抄下就變o左舊固體, 都幾得意! 我叫o左個香蕉抄冰, 都幾濃香蕉味, 食落有d似雪芭, 幾滑, 都唔錯, 但$28, 又系貴o左d!之後沿路返沙田,西鐵真系好快, 十幾分鐘就由南昌入到元朗, 但真系好貴, 單程要$15, 不過有一天無限乘就無所謂! 但輕鐵就超唔掂, 超慢, 元朗去濕地公園要成30分鐵, 仲慢過出市區! 元朗, 屯門同天水圍真系太偏僻, 出入市區好貴, 坐巴士又遠, 唔多方便!(B仔涼粉(佳記)餐牌)
(B仔涼粉(佳記)餐牌)
(鮮雜果黑珍珠)
(濕地公園)
(蟹)
(香蕉抄冰)