玩就玩咗啦，等我都學吓人做番個總結先，或者系處講多少少俾有心去玩的人昨一些參考(我無乜幾何架)，不過呢一啲其實系網上都隨時可以搵到，而我以下所講既都系一啲我有做過既野，所以，我無做過既，你地千祈咪問我。仲有，我系Cheap友，想嘆世界既，就唔系呢杯茶了！
貨幣：全個柬埔寨以美金為主，我呢次去玩，一個仙當地貨幣都無兌換過。只要去玩叫飲叫食或買野，盡量要叫“整數”，因為遇有“零頭”，當地人一定會收美金但找回柬埔寨錢俾你，到時錢又帶唔走，兌換回美金又蝕彙價就唔好啦！不過真系有剩，留俾酒店當貼士，或在路上派俾那些因為地雷受害人士，做吓善事都可以的！仲有，因為搭飛機離開暹粒時，要俾『機場建設費』25美金先走得，所以記得啲錢唔好用咁盡呀！
天氣：呢個地方全年都熱及全年都咁好陽光(要做足防曬呢，但晚上就好清涼)，佢無春夏秋冬，而只有分旱季及雨季，基本上每年11月後便是旱季，因無咁熱及小雨(但我呢次去一滴雨都無落過呢)，同時亦即旅游旺季。但雨季出游，有些地方如Kbal Spean(高布斯濱)，雨季梗本唔適宜去。但我有戴帽及太陽油，都仲曬到黑過去釣魚，好慘呀！唔靚仔啦！
語言：全程用英文就可以，不管你有幾水皮，不過我酒店那個負責人，普通話仲叻過我呢(叻過你又有幾難呀？)！
前往交通：如果由香港直飛，只可以去到Phnom Penh(金邊)，到了那裡去暹粒必須於第2日，另外坐6小時既巴士。想直接去暹粒，一系由廣州飛，要不然便是坐其他航空公司經曼谷、新加坡或吉隆坡等等，再轉機去暹粒。不過現時去廣州都很方便，什至由深圳或珠海都已經有機場巴士，遲少少廣州機場地鐵及高速鐵路開埋仲方便。加上南方航空機票價錢夠平，值得考慮(如果有內地發出既信用卡，機票是會更便宜的，聽聞去那裡，預早定票最平可以平到人民幣1200(連稅)內搞定，但記著，是聽回來的，我也不肯定是不是可以有那麼便宜)。
當地交通：有錢既坐私家車啦，但大部份人都系坐Tuk Tuk為主，市內1-2美金，而我呢次去既系全日游小圈13、大圈15、外圈25，都系酒店幫我安排既(我都懶得去問料)，因為我都已經覺得好合理了，加上那裡Tuk Tuk通街都系，更本唔駛預定或講價(自己去搵要問餐死，又唔知好唔好，煩，由酒店安排，有事不滿都可以由酒店出頭嘛！)。不過要留意系，有些酒店或Tuk Tuk司機，如果要去睇日出，會加收費用的！另外，預定住宿，會包接但唔包送。如果喜歡騎單車，街外租既都系1-3蚊。但我住那地方，有免費單車任玩！用來代步唔錯，路上交通看似混亂，但其實無問題的！但那裡市中心好細，我都系做步兵算了。
住宿：那裡是游客區，所以高中低檔酒店多的是，我見過最平由3蚊起，有冷氣及冷熱水衝涼既貴少少(我全既就系呢種，不過裡面裝修一啲都唔差的)，而且好多酒店都有不同既額外設施，如免費24小時咖啡奶茶、、電腦上網、單車、早餐、按摩(20分鐘)、機場車站接人、泳池。不過要留意，當地大部份都系用太陽能熱水器，日光日白黃昏當然無問題，晚上就要小心了，因為我去既時候，晚上一般只有18-19度，好涼吓，而我去咁多晚，更本唔駛開冷氣，早知我就住無冷氣房，可以平多6蚊。而我住呢一個檔次，入住時唔雖要俾任何錢包括Deposit，總次不論多少天，當你Check-out時先一次過付清所有房費及Tuk Tuk車費！
食物：表面上柬埔寨既食物，似泰國及中國菜，但一啲都唔辣，以椰汁做餸為主。不如做一個很粗略既比較，等大家知道有乜分別(大酒店或高檔既唔計，因為我都無食過)。
路邊或本地人 市場/大排檔 市內餐館 景點大排
為主既餐廳 檔/餐廳
相同食物 1-1.5 2-3 3-8 5-6
相同飲品 0.5-1 0.5-1 1-4 1-2
其實大家都系食相同既野，不過只要你有膽，肯去本地人既餐廳，真系可以好平，兼好好味，當然，環境裝修一定無咁好！不過我食多幾日柬埔寨野都覺得悶，因為那裡以飯為主，魚為副，有機會去食吓意粉或Pizza，其實仲平兼一樣好好味！(仲有就系，我咁多日都無肚痛過，放心食，唔死得人既！)
如果想更平，走去超市買定面包及飲品都系一個必然選擇，因為就算酒店有包早餐，你去睇日出個日，咁早都無得你食啦，所以呢個時候，自備面包及飲料真不可少。
按摩：其實系自己住既地方，由酒店安排先系最平，出到街上或酒吧街既，會貴好多。講講價錢先！Guesthouse可以安排既一般都只有“全身”及“腳部”3-4蚊、“香油”7-8蚊一個鐘，街下既我見過既就由5-20一個鐘！其實柬埔寨式按摩，感覺系泰式加中式指壓既混合體，不過如果要求高及想多幾種方式，如Spa或兩個人一齊幫你按，你就真系要出外面了。
景點：呢處可以睇既主要系寺廟，不過連睇幾日，肯定會出現『審美疲勞』既問題，不過無辦法，日頭就系睇佛寺，晚上就Hea.........如果想平衡一吓，那裡其實還以去睇吓一個戰爭或地雷博物館(不怕見到人間慘況例外)，又可以去“洞裡薩”淡水湖睇吓當地漁/貧民生活既地方(但那裡更污穢更亂)。對於我來說，去那些景點睇三日都夠了。但那裡也真的是一個拍照的好地方，不過都不外是破破爛爛的廢墟或石頭，喜歡就話，否則一定悶死！我在想，如果攪個攝影團，可能會好好效果都唔定。
工具：有兩樣野系必備既，就系口罩或可以遮到口鼻既嘢，因為坐Tuk Tuk時路邊既沙麈及電油味好大架；另一樣就系電筒，系睇日出日落時有用。
算帳：埋單計數既時候了，呢次去旅行，駛咗唔多，亦達到了預期目標，主要平系機票錢上面，我玩咗5日，早上出發，深夜回來，時間用到盡。計埋由屋企出門口開始，火車的士去廣州來回全包、機票及當地住宿、飲食、使費、簽證入場費，總之乜錢都計，直至返到屋企，約港幣3,600元左右！都算好平了！(好捱得既自然可以更便宜啦！)
真系老套，成日講錢！................................(真悶人呢！哈~哈~)
玩咗呢個地方，對於我呢個悶人來說，真系幾好，好似好適合我咁，好喜歡那裡的平靜，好喜歡那裡的藍天日照，好喜歡那裡的星空月夜，好喜歡那裡純樸的生活，真系唔知仲會唔會再去？但系問題系，我玩完呢個地方，咁下一個玩既地方又會系乜呢？睇黎又要有排想了！煩！
(1)
(2)
(3)
(4)
(5)
因為時間關系，我並沒有把原來版本，由廣東話轉為普通話，所以大家如看得不太明白，懇請見諒。要想觀看原來版本，請看本人網綕如下：
http://hk.myblog.yahoo.com/jw!dq4ItW6RGAV5vdRc8KBhHiym0lgl/article?mid=5243&prev=5302&next=5218