其實一直都好想去桂林睇下山睇下水.. 終於喺六月初決定去桂林加陽朔度假...
喺六月初就上網check最廉價機票... 終於搵到六月二十三號下午五點半嘅機票先160大元,加埋機場建設費同燃油費一共係230大元.. 不過買此特價票嘅網站黑了我們20元.. 所以呢張機票因水漲船高最終價錢係250大元嘅... 買完機票就晚晚都上網搵攻略啦..book旅館啦..之類嘅.. 好喇..帶著萬千期望終於開始寫此旅游片段.. 去片..
6.23
早上十點幾俾手機短信嘈醒, 原來係南航發短信嚟提醒我今日下午五點半嘅飛機去桂林..同埋叫我揀位..我就揀咗窗口位啦,諗住可以影下D雲啊嘛.. 然後佢就回我話我係坐第十三排.. (其實我係買最最最平嘅機票,係O倉嘅..正常係應該坐最後先啱.. 點知可以坐得咁前.. 不過最後因爲我嘅同伴係機尾,咁啱機尾有好多位我就去埋機尾喇.. 坐係我隔離個女人肯定好開心)
我哋三點半出發去東方賓館度搭機場快綫5出發去白雲機場了..去到大概係四點一兩個字咁上下啦.. 因爲我哋都係第一次搭飛機.. 所以非常之蠢..首先唔知係邊換紙質機票, 搞咗好耐終於係場內果D自助咩咩機度換咗機票.. 不過我果個係電子登機牌.. 完全無紙質呢下嘢.. 我就一路行一路講.. 你就好啦.. 你有機票.. 我又無.. 你就好啦... 好羨慕你啊... 跟住唔知去邊托運.. 最後係最後關頭問咗D工作人員先可以唔使排隊加成功托運.. 然後就去安檢同登機.. (由於時間真係十分緊張,所以我哋無時間去影機場..)
五點三就上到飛機.. 等啊等啊等啊... 等到五點七都唔起飛哦.. 然後個空姐就用D好難聽得明嘅普通話同英文講咗一大段嘢.. 意思應該係話要遲D先起飛咁上下啦.. 最後五點五十幾分先成功起飛... 嘩.. 唔係講笑.. 本來已經好緊張加上坐機尾震到不得了.. 不過空中嘅景色係十分靚嘅..
飛咗一共五十分鐘.. 此時我就非常後悔無買回程.. (因爲回程機票比去程貴差唔多一倍.. 所以.. 你懂的...)
喺18:49到達桂林 (桂林機場無白雲機場咁大咁靚.. 好細..感覺咩都無.. 同埋係非常非常細...)
出咗機場我哋就搭咗機場快綫去桂林火車南站.. 因爲事前已經訂咗旅館同埋已經print咗去旅館嘅地圖同check好搭咩車去旅館.. 所以我哋一上車就研究去到旅館之後去邊食嘢.. 食完嘢要做咩...
接近7:30我哋到咗桂林火車南站對面果間咩咩咩酒店.. 然後就開始問公交車站.. 因爲天色已黑.. 桂林路燈較少.. 所以好難睇得出邊樹有公交車站... 然後我就攞咗部手機出嚟上GPS.. 因爲信號緩慢.. 地圖update得較慢.. 令我哋行咗不少冤枉路.. 最後搵到啱嘅公交車站,睇站牌.. 上咗我哋十幾年都未搭過嘅雙層巴巴.. 好熟悉嘅感覺.. 令我諗起喺我記憶中最後一次搭雙層巴巴嘅時候係同我表弟阿傑搭雙層巴巴唔知去邊.. 我仲好清楚果陣我哋係坐第二層最前果排.. 我仲同佢一齊唱飛天少女豬事丁添.. 不過佢應該唔記得喇.. 佢果陣太細喇...
我哋搭到去秀峰區政府就落咗車.. 然後搵間旅館.. 搵啊搵啊搵啊.. 搵咗個幾鐘都搵唔到.. 最後決定打的去.. 嘩..唔係講笑.. 原來間旅館係非常十分深入架..怪唔得我哋點搵都搵唔到...
我哋住嘅係網上頗高評價嘅[桂林懶貓青年旅社]
呢間旅店非常有特色.. 同埋店主非常熱情.. 不過價錢有D貴.. 要138一晚... 的士司機話呢D家庭旅館根本唔使呢個價.. 呢個價可以住當地三星酒店了..
所有畫同評論都係喺牆身度.. 似乎住嘅人對呢間旅館都相當滿意.. 我見唔少評論都係話以後一定會再翻嚟之類.. 同埋真係有好多外國人喺間旅館度住...
因爲去到旅館都已經九點幾十點.. 第二日仲要早起.. 所以我哋收拾下行裝.. 梳洗下就休息了...
6.24
早上九點幾起身梳洗.. 就開始我哋之前plan好嘅徒步遊兩江四湖喇...
早餐就梗係食桂林最出名嘅桂林米粉啦.. 原來桂林嘅桂林米粉同廣州果D桂林人桂林米粉係唔同架.. 喺桂林好少店會有得揀要咩咩咩粉.. 可以揀嘅淨係得"一兩,二兩,三兩" 兩數唔同價錢就唔同.. 同埋桂林食桂林米粉係唔會俾湯你架.. 果度D人大多數都係就咁加D配料撈嚟食.. 如果你想加湯可以去攞粉果個窗旁邊自己倒D湯.. 同埋呢.. 配料好似酸筍,酸豆角,酸蘿蔔等等都係自己係配料架度自己加..中意幾多就自己加幾多.. 同廣州果D真係大大大不同啊....
食完早餐之後就開始我哋嘅征途... 徒步遊兩江四湖....
(其實我訂果間旅館另一個原因係因爲佢係兩江四湖附近.. 途中A點同I點就係懶貓喇...)
(該圖係我喺google map度制定路綫佢show俾我睇嘅.. )
出發..
喺萬祥隔離呢條路就係曡綵路喇.. 我哋就沿路行啊行啊.. 行咗一陣就到咗曡綵山..
曡綵山係桂林最高嘅山.. 可以將成個桂林盡收眼底.. (門票20元)
上山嘅途中咁啱有個小旅行團要上山.. 我哋本來諗住扮團友一齊聽解析嘅.. 可惜個導游行得太慢.. 我哋決定唔等佢自己行嚕...
上到半山就見到一個大山窿.. 裏面全部都係佛像..因爲要尊重神明..所以我無影入面D佛像..
沿山路之上就係明月峰.. 即繫曡綵山最高嘅地方..
企喺桂林最高處.. 將桂林盡收眼底.. (其實我哋去果日係上午落小雨.. 有霧.. 所以D相唔多清晰.. 不過落雨都好.. 唔使咁熱... 上到山頂我哋已經除曬拖鞋企喺D石頭上唞涼)
曡綵山入面仲有個稀有蝴蝶舘..不過入到去唔俾影像..
喺曡綵山玩咗兩個幾鐘之後我哋就出發去伏波山喇...
因爲網上話伏波山其實無咩特別值得好睇.. 我哋就唔入去喇.. 因爲門票仲貴過曡綵山.. 要二十五.. 所以我哋喺門口影兩張相就扮自己入過去喇..哈哈哈..
行過伏波山就準備出發去桂林市徽像鼻山啦... 不過像鼻山門票已經升咗好多.. 而家已經要40蚊以前先25咋.. 所以我哋無入去..本來好似網上講嘅咁可以搭竹筏過去.. 不過去到灕江邊D人都話而傢政府已經唔俾竹筏去像鼻山.. 要去嘅隻可以搭政府搞果D游覽船.. 50蚊一個人.. 可以遊十大名山.. 咁計落都OK接受到.. 我哋就決定搭大船遊喇...
遊完船河之後就諗住係碼頭附近搵間平平哋嘅飯店食個飯仔開心下啦.. 皆因前一晚係無食晚飯.. 我哋淨係食咗個bruch.. 所以係非常餓嘅.. 點知搵來搵去都係得桂林米粉.. 咁我睇就揀咗間個樣幾靚嘅去食喇.. 喺果間桂林米粉鋪度發現.. 原來桂林有D點係七點之後每份餐都要貴五毫子.. 豆奶仲貴過維他奶.. 要兩蚊.. 仲要唔多好飲..
食過晚飯之後就繼續遊我哋嘅四湖喇.. 下午已經遊咗灕江同埋望咗桃花江(我當自己遊咗)..
桂林嘅園林設計,燈飾都做得非常好.. 靚到無得頂啊...
然後係沿桂湖翻翻我哋嘅旅館.. (其實我哋第一日到桂林搵旅館果陣已經遊過.. 所以都無細遊.. 不過此四湖夜景燈飾真係十分靚) (P.S. 如果唔想好似我哋咁徒步都可以搭夜游兩江四湖嘅觀光船.. 149蚊一個人.. 遊覽時間大概係兩個鐘.. 不過我見佢啊.. 開得非常快.. 同埋太多人係船度.. 如果你唔係坐窗口位都好難影到D咩..)
遊完兩江四湖之後我哋就去咗附近市場度買咗D麵包牛奶同零食翻去夜晚睇波食同埋聽日早餐.. (桂林市區唔係好大.. D路好易認.. 行一次基本上記得點行..)
本來諗住25號去龍脊梯田嘅.. 其實酒店都已經訂好.. 不過因爲之前落雨落得好犀利.. 我驚山雨路滑唔安全就打消咗呢個念頭.. 其實25號早上差唔多七點龍脊梯田酒店老闆都有打俾我確認係咪真係去.. 不過我已經諗住唔去.. 唔好意思拒絕所以無接佢電話.. 不過到九點幾出房門先發覺原來25號係非常好天氣.. 陽光十分燦爛... 我有少少後悔.. 不過都無辦法.. 因爲我哋已經決定咗去灕江精華遊.. 跟住我哋就諗住去到陽朔玩兩日然後再係陽朔去梯田之後再係桂林搭火車翻廣州.. 不過之後一直天氣都唔多好.. 日日都係落小雨.. 天隂隂咁.. 跟住我哋就打消咗呢個念頭啦...
6.25
我哋係房度梳洗完食完早餐就叫旅店老闆幫我哋訂灕江精華遊嘅竹筏喇.. 60蚊一個人.. 24號係灕江邊都好多人話幫我哋訂..不過要100蚊一個人..
離開旅館之後我哋就搭雙層巴巴去翻桂林火車南站度搭車去楊堤路口喇..
去到桂林火車站.. 搵到車去楊堤路口啦.. (旅店老闆明明同我哋講係7蚊一個人.. 點知去到要10蚊..)
我哋一上車就發短信俾竹筏工同佢講車牌號碼.. 叫佢係楊堤路口等我哋.. 去到路口我哋同竹筏工一齊等車再搭車去楊堤碼頭準備搭竹筏遊灕江喇...
我哋由火車站=>
楊堤路口(10蚊)=>
楊堤碼頭(3蚊)=>
灕江遊(兩人120蚊,三人130蚊,四人140蚊..)=>
興坪漁村=>
陽朔(5蚊)..
去到陽朔..本來諗住住係西街入面嘅..點知一落車就俾一旅館老闆娘捉住.. 最後我哋屈服.. 入住咗佢果間面山面灕江有陽臺嘅房.. 一晚80蚊.. 果間嘢就正正係網上好受歡迎嘅懶人堂隔離同無名堂對面.. 店面比較樸實.. 唔好似懶人堂同無名堂咁小資.. 總體都OK可以接受...
去到陽朔就梗係要試下果度最出名嘅啤酒魚啦.. 老闆娘介紹咗佢覺得最好食果間啤酒魚俾我哋.. 叫謝三姐..
老闆娘話食啤酒魚最好就係食咩毛骨魚即係塘虱.. 40蚊一斤.. 你哋面前呢盤魚已經要78蚊...
姐姐本來飲啤酒係會過敏嘅.. 我諗住我食新鮮芒果會過敏但食制過嘅就唔會.. 咁我食啤酒魚都應該唔會點過敏... 我咁諗就錯喇.. 雖然呢盤啤酒魚係無咩啤酒味.. 但我食咗一陣就已經開始起曬D小疹子喇.. 過敏效果十分迅速.. 所以我哋早早食完就去搵藥店買過敏藥... 然後即刻翻旅館.. 因爲我已經開始十分煩躁同唔舒服.. 本來當晚係諗住食陽朔特色小食同燒烤嘅.. 最後都係食唔到.. 好在我哋係沖完涼先出去.. 翻到旅館食完藥十點都未夠就瞓咗喇...
6.26
遊遇龍河.. (130蚊一隻竹筏, 可以坐兩個人)
早上起身去同老闆租咗單車準備去遊遇龍河.. 老闆娘好熱情咁同我哋講話可以幫我哋帶路... 我哋喺旅店附近食咗桂林米粉之後就開始踩單車去遇龍河精彩遊嘅上游.. 老闆娘幫我哋打點好一切.. 教我哋點喺下游踩翻旅館之後我哋就跟竹筏工上竹筏開始遊喇...
遇龍河中間有好多壩.. 用嚟儲水嘅.. 我哋就搭住竹筏一級級咁遊到下游.. 有時有D壩好高就會好蹬..同埋D水會彈到成褲都係..所以係一定一定要著短褲同埋拖鞋去...
遊完遇龍河我哋仲踩咗單車去大榕樹門口同聚龍潭門口扮去過..
踩到三點幾就去咗附近嘅農莊度食農家菜做下午茶... 其實都係因爲果間嘢個招牌話有燒鶏食..我哋先去嘅...
不過果度D燒鶏同我哋D唔同.. 不過林大明話.. 喺果邊..燒鶏就係指呢D... 因爲佢哋無炆呢個字眼.. 我暈.. 不過真係好好味..真係土鷄咯..啱先仲見佢喺門口玩..轉頭就去咗我個肚喇...哈哈哈.. 燒鶏65蚊, 炒番薯苗8蚊.. 好味...
食完農家菜之後就按住老闆娘話無咁多車.. 唔危險嘅路翻旅館.. 撞佢個鬼一共踩咗兩個幾鐘先翻到西街.. 本來踩唔使一個鐘就得架啦..無拉拉要踩兩個幾鐘.. 攰到你啊...
我哋喺沿途買咗個黑美人.. 一蚊一斤...
因爲下午茶食得太過豐盛.. 我哋都唔係咁想食晚飯.. 所以我哋就去咗逛西街啦..
行過張飛牛肉買咗包唔係好好食個四川特産...
之後就搵燒烤檔食燒烤.. 因爲世界杯期間.. 間間店都爆滿啊... 最後我哋揀咗間好乾淨嘅燒烤檔.. 點好之後就坐係度邊睇世界杯邊等食.. 嘩.. 好好味啊.. 又乾淨又好味.. 尤其是D燒茄子.. 簡直就係正啊.. 佢可以燒到D茄子好容易離皮同埋D皮唔噥架... 正.. 第二晚都係係呢間燒烤檔度食宵夜.. 老闆同我傾計話.. 佢開咗呢間燒烤檔已經十年喇.. 其實而家唔開都無咩問題.. 但係唔知點解仲要繼續.. 佢話晚晚都要燒到三四點.. 好攰.. 我話..唔辛苦點得嚟世間財啊...
食完燒烤就翻旅店大覺瞓嚕...
6.27
因爲早上起身落好大雨.. 所以我哋諗住等無咁大雨先出去.. 然後就落去買咗早餐同埋叫老闆幫我哋訂去銀子巖嘅門票.. (銀子巖:70蚊一人, 包車接送連門票)
我哋就係房度睇加菲貓食我最中意嘅即食麵同張飛牛肉.. 差唔多三點老闆就話車嚟喇.. 叫我哋出發去銀子巖喇..
wow.. 銀子巖好靚啊.. 遊了銀子巖,一世不缺錢..
大概六點鐘我哋翻到旅館.. 梳洗完之後就打算去網上話D西餐好好味嘅紅星特快喇.. 搵啊搵啊.. 搵咗成個鐘終於搵到佢喇陰功.. 一行入去. ..我就好細聲咁講.. 嘩.. 一個人都無嘅.. 一坐低一路睇餐牌一路覺得間鋪好臭..
我哋點咗好難整得唔好食嘅夏威夷風光同一個墨西哥鶏肉卷套餐.. 諗住唔夠再叫.. 點知.. 個墨西哥鶏肉卷D肉仲老過D乜.. 不過配果個炒飯好好味.. 個好難整得唔好食個比薩真係唔係講笑.. 一D都唔好食.. 竟然可以攞腸仔嚟代替火腿.. 你話攞唔攞命...仲要係攞好鬼平果D..一舊粉果D哦.. 我哋係入面連等帶食成個鐘.. 係一個人都無入過嚟嘅.. 全場係得我哋同幾個服務員.. 仲要食咗我六十幾蚊哦.. 真係怪唔得無人嚟啦... 咁難食..網上仲要咁高評價添...
之後我哋就去咗食前一日見到好想食嘅蓮子羹.. 三蚊一碗.. 食咗兩羹就飽曬.. 上面果D粉都係唔同味架.. 我覺得好味係黑芝蔴..因爲裏面有桂花糖..
之後去買手信俾D兄弟姐妹.. 女仔朋友就一人一條藏銀手鏈.. 男仔就係D特産咁啦.. 女仔抵D咯.. 有得攞有得食...
6.28
本來前一日問過老闆最早一班車翻廣州係12:30嘅.. 點知我哋12:00去到車站問.. 最早果班車係10:20.. 同買早上淨係得果班.. 諗住早上翻廣州嘅希破滅.. 唯有買定晚上翻廣州嘅車票 8:00 晚上最早一班 120蚊一人. 翻旅店寄放D嘢就去遊早上嘅西街..
諗住搭公交車可以消磨下時間啦.. 我哋特登揀咗綫路最長嘅果部車嚟搭...
我哋去咗陽朔公園啦.. 附近度遊啊..逛啊.. 好不容易先到5點.. 我哋即刻去搵地方食晚飯.. 途中食咗好好味嘅豆腐.. (3蚊兩件)
去咗沒有飯店度食飯.. 可能太早食飯同埋啱啱食咗豆腐.. 覺得D菜唔多好食..
食完飯坐到差唔多時間就翻旅店度攞翻我哋D行李.. 出去旅店附近個公交車站搭車去車站.. 因爲下午搭過.. 覺得非常方便..
7:53上咗我人生第一次搭嘅臥鋪車.. 好在唔臭.. 幾乾淨..
瞓咗一覺6:30到芳村客運站..