終於實現第一次高鐵之旅……
雖然好out，不過都要紀念下2012年5月11日上午9點搭上廣州南開往長沙南的高鐵列車。講真，上車前都有D怕怕，畢竟上年件事真系好恐怖。列車行駛都幾平穩，位置都好闊落。最高時速去到接近350，望出窗外同普通動車組一樣。據聞話玻璃有視覺減速功能，不過林唔明咩原理。
今次系一大幫人跟團，行程系長沙+鳳凰，前後3日。
第一日：岳麓山愛晚亭&橘子洲頭&坡子街
午餐響一家叫杜甫酒家滴地方食飯。一行入去，見到嘅唔系“杜甫”，系“毛主席”。紅當當嘅設計，好革命嘅顏色。
午飯後，開始旅程！從落車地方行去岳麓山腳，要穿行過湖南大學的校園。山腳下嘅大學，空氣都清新D。
踏入岳麓山冇幾遠，就見到鼎鼎大名的岳麓書院。響山坳裡面，好寧靜好有讀書嘅感覺。門票30。
愛晚亭其實就一個好細嘅亭，冇咩特別的。不過前面一灘水，都有幾分幻想中九寨溝嘅韻味。如果秋天，配上滿山紅葉，一定靚到爆燈。
之後去到橘子洲頭，呢個景點其實就好似二沙島咁。島嘅最外端有一個由廣州美院學生設計嘅偉大領袖毛主席頭像。從頭步行到頭像來回需要3個鐘，可以選擇比20雞坐電瓶車。沿途有幾個景點，冇咩吸引到。在島外坐車都可以見到頭像，實在冇必要上橘子洲頭。講白了，就系一個旅行社忽悠的景點！
晚上去到坡子街，選擇了所有攻略幾乎必提嘅火宮殿。一坐低，冇數旗子圍住你，真系壯觀。出品中規中矩，臭豆腐比唔上樓下排隊果檔。
最開心嘅系，晚上入住號稱長沙唯一的白金五星級酒店，做左一晚有錢淫
第二日：鳳凰古城
早上6點起床，開始漫長嘅游車河，由長沙去常德，常德去吉首，吉首到鳳凰，加埋中午食飯。下午3點幾先到鳳凰。踏入鳳凰一刻，傻眼！真系見識到咩叫游人如梭！
午後嘅古城，落過雨，濕嗒嗒滴，天色有點灰。自動過濾眾多嘅游人，忽略耳邊叫賣嘅聲音，景色確唔錯。沱江邊垂釣嘅壯男、洗衫嘅婦女、嬉戲嘅孩童、賣花嘅老人，配上沱江緩緩流動嘅水以及對岸嘅吊橋，都可以成為一幅完美嘅相。古城內大小商鋪眾多，秘密麻麻，仲有現場整姜糖滴。由於導游提醒唔可以隨便拍攝當地人，錯過好多值得記錄滴畫面。
晚上嘅古城，熱鬧非凡。兩岸轉身一變成為酒吧街，一間連一間，震耳欲聾，就好似煙花之地。即使夜景再靚，都冇心欣賞。當然對於喜歡熱鬧嘅人黎講，或者是天堂。超高度嘅商業化發展，讓古城失去本應獨有，並且應該系賣點嘅果份“寧靜”消磨殆盡。剩下嘅只有游人衝衝而來、衝衝而去留下嘅印記，而古城本身嘅魅力卻隨之慢慢消失。
清晨嘅古城，靜謐嘅古城，系傳說中果個如詩如畫嘅古城。早上5點，睇住古城天空逐漸變光。由於時間早，游客要麼未到，要麼仲響睡夢中。只有古城嘅居民開始一天嘅生活。古城就好似一幅山水畫咁3D效果立體呈現面前。靜到令人心情都舒緩，靜到令人發藕竇。最愛清晨嘅古城！
第三日：汽車高鐵地鐵公交聯運之旅
上午7點幾響鳳凰上車，之後就系8個鐘汽車程到長沙，跟住接近3個鐘高鐵到廣州，再黎20個地鐵站，最後2個站公交壓軸！建議正在考慮跟團高鐵鳳凰游滴孩子考慮下petpet滴感受喔，估計直接廣州火車去吉首，再過去會比較舒適。跟團趕鴨仔式去鳳凰，系冇時間冇辦法領略到屬於呢度嘅風情
Anyway，總算去過鳳凰了。雖然同想像中唔同，但系我會記住果個5點起床，響古城晨運嘅早晨，記住果個清晨霧氣中如幻如真嘅鳳凰古城~~~