臨近10.1，捻起無聊嘅7日假期，需要搵個地方揮霍下時間。出去旅游，飛機票又貴，人又多，而且又唔知道去邊。捻下捻下，不如坐下高鐵，價格又固定，最後就決定去湖北了。
9月29號去南站買高鐵票，點知道只能買到10月2號晚上嘅票，過節真系恐怖。
D1：10月2號晚7點坐4個鐘，11點到達湖北武漢。坐火車站到市區嘅大巴，大概1小時到達武漢市武昌火車站附近。入住提前預定嘅“莫泰168”酒店（酒店情況一般，本來想住如家，但一早俾人訂曬，將就下先）。
小細節：
1.高鐵到達武漢火車站後，有到武昌和漢口嘅車。去邊度，就睇個人起好。據聞去漢口會容易D感受到武漢當地特色。但交通就武昌方便D。反正我就去左武昌。
2.其實按我嘅計算，其實兩人或以上，打的去武昌火車站應該會更劃算。
3.如果提前可以訂到去武昌—十堰嘅動車（13點嘅車，十堰到武當山車程為50分鐘），建議當晚直接殺過去武昌戶部巷附近住，明早試完小吃再出發。
D2：10月3號早上8點半醒，食個早餐就去火車站坐火車到武當山。原先想趕8點58分果班火車（因為依班車到武當山只需5小時），但由於時間無趕上，只能坐10點10分果班，依班車需時8小時。買到臥鋪車票。反正臥鋪，眠一眠就到。下午6點鐘到達武當山火車站。車站好細，但風景唔錯。出到站後，其實唔系武當山鎮（原先車站系武當山鎮，但車站要重修），需要坐車到武當山鎮。車程大概20分鐘到。可以坐站口嘅私人車（價錢大概10到15蚊1個人），或者坐十堰到武當山嘅車。晚上就系武當山鎮四周行下。
小細節：
1.上火車前，買左D當地出名嘅“周黑鴨”鴨脖系火車食。講真果句，真系幾野味下。值得推薦。
2.武當山鎮有兩種酒店，一種系正規酒店或賓館，另一種系私人住宅改裝成酒店。喜歡邊種就住邊種。
D3：10月4號早上7點出門口。武當山鎮D早餐真系不敢恭維，我地都系隨便食D野就算。大概8點到已經到達武當山門口售票處。門票比較貴，好似系200幾蚊，包含觀光車（其實車只去到山腰）。無記錯上山有兩條路，一條系去索道，一條系行山路。我比較中意行山嘅，所以我就坐去南岩嘅車。我系耐力一般嘅人，因此從南岩開始爬到上山頂一共耗時為5小時有多。上到山頂時間大概為14:30分，由於國慶假期，上金頂嘅人實在太多，顧及到時間問題，所以最後無上到金頂，就系山頂直接坐纜車翻山腰，再坐觀光車翻出景區門口。到酒店收拾行李後，就坐車到十堰（要到神農架，系武當山依邊一定要從十堰出發）。
小細節：
1.早上建議將行李放系酒店，落山再摞。南岩果度有酒店住，如果喜歡嘅話，可以系武當山住一晚。景區觀光車最遲收車時間為17：00點。其實如果行武當山唔想禁辛苦，可以系先坐纜車上山頂，再行翻落黎。感樣時間就充裕D，而且下午上到山頂肯定比較多人，所以上金頂基本要排隊。
2.到十堰後，建議入住三堰客運站對面（有間如家），因為只有系三堰汽車站先有車去木魚（神農架中最方便嘅小鎮）。車站附近有間食魚嘅，味道唔錯，大家可以去試下。
3. 三堰客運站到木魚嘅車，一日只有1班，建議提早買定。如果買唔到，都可以先坐車到房縣（松柏），再系房縣（松柏）轉車到木魚。效果一樣。
D4：10月5日早上9點開始坐車，歷時6個幾小時，下午3點半到達木魚鎮。到步後就搵酒店，酒店同武當山情況差不多，有私人，有賓館，任由選擇。搞掂酒店後，就系當地嘅旅游代理預定聽日到神農頂嘅一日游路線，內容包括神農架景區以及九大湖景區游覽。搞掂曬後，見仲有時間，就到附近景點“香溪源”行下。景點離木魚好近。車費唔超過10蚊。景點游覽時間大概須時1小時左右。
小細節：
1.臨近木魚鎮之前，大概時間為下午2點多，中途會到達紅坪鎮，紅坪鎮有個景點叫“紅萍畫廊”，我今次因為唔系太清楚情況，怕游玩後唔夠時間以及去唔到木魚，所以無去到。原來系紅坪有車或可以租車去到木魚。之後我都有D後悔無去到，畢竟系景點，都好想去行下。
2.木魚鎮入邊嘅旅游代理主要行程分為有1到3日游，有時間可以根據自身實際情況安排。如果唔想跟當地旅游團，都可以自己租車再雇佣個司機玩（適合人多情況）。
D5：10月6日早上集中出發，主要游覽神農架以及九大湖等一系列景點。由於臨近秋天，景色一流，個人認為值得再去一次，而且系自駕游果種。整個行程尚算系時間充裕，但太過脂油嘅話，可能就會唔多夠時間。反正唔系非常地拖拉嘅話，應該系玩得比較有意思嘅。
小細節：
1.早上出發前，系當地食左個早餐，系豆漿+生肉包，超正。大概位置系當地一間大型酒店隔離，系一條橫道嘅盡頭。有興趣可以問下我。
2.臨近秋天時節，沿路風光非常好，感覺好似遍山瑞士糖，真系好靚。
3.如果時間再允許，而且有錢嘅話，可以參觀當地野生金絲猴生活情況。價錢好似系200蚊/人。今次時間較緊，而且真系覺得有D貴，所以無去到。
4.由於聽日就走，所以一日游結束後就馬上買翻宜昌嘅車票。由於木魚到宜昌一日得1班車（無記錯），系13:30分出發，車況較差，而且位置較少（大概20人），建議提前訂購。
D6：10月7日，訓到自然醒後，買D土特產後就上車坐車翻宜昌了。車程大概為5小時。回到宜昌車站已經為晚上7點了。系車站買埋高鐵票，以及翻武昌嘅車票。住提前預定嘅如家酒店。個人感覺，宜昌當地無咩特別好食嘅野。出名應該系魚，我去食果間就覺得比較難食，系當地司機帶去嘅。
小細節：
1.木魚當地土特產主要為“木耳”及“核桃”。其實這依兩樣野聽講都系系從房縣果邊運過來嘅。木耳建議買多點。因為每個黎我屋企食飯嘅客人，試過木耳嘅都話正。
2.翻武漢嘅車，有分漢口以及武昌。我系翻武昌嘅，車況分豪華以及超豪華兩種。區別為1排四座及1排三座，差價為40蚊。如果經濟允許嘅前提下，建議坐超豪華，畢竟車程為5小時。
D7：10月8日，8點左右就坐車翻武漢。翻到武昌已經為1點幾，原來打算去黃鶴樓行下以及試下當地嘅特色小食。點知道上到的士後，司機極力反對去黃鶴樓，理由為黃鶴樓唔系咩名勝古跡，而且收費又貴。所以試左當地特色小食後，就出發去高鐵車站了。坐晚上18:00點嘅高鐵翻廣州。晚上10：00點左右翻到南站。完結整個行程。
小細節：
1.早上坐超豪華車果時，汽車上嘅廣告為“地面上嘅A380”，真系比較搞野，不過車況呢就真系比較舒服。系大奔黎嘅。
2.當地最出名嘅特色小食為“熱干面”及“糯米包”，但我去左當地最有名嘅餐廳食過後，但覺得木魚嘅仲好食D。大家到時可以對比下。
3.翻廣州前，如果想買周黑鴨做手信嘅，建議系武昌市區買。因為去到高鐵車站系無周黑鴨買，只有其他牌子，而且價錢都好貴。
總結：其實10.1黃金周，比較出名嘅旅游景點都會非常多人。而湖北畢竟系較冷門嘅旅游地方，系假期中比較好嘅選擇。總體感覺系幾唔錯，值得國慶期間避開人群嘅旅游地點。
優化行程如下：
D1：早上廣州出發，中午到武漢跟住直接去武當山
D2：武當山1日游後，跟住到十堰
D3：早上從十堰出發到木魚鎮，途徑紅坪鎮落車游玩，跟住再去木魚鎮
D4：神農架二日游
D5：神農架二日游
D6：神農架出發翻宜昌
D7：宜昌出發翻武漢，再翻廣州
