又到興奮寫攻略嘅時候，每一次都覺得有太多太多嘢想寫低，都唔知從邊到寫起……
今次旅途6日，6月8日到13日。早機去晚機翻。海陸空聯運，樣樣齊全。公交、雙層巴、地鐵、飛機、火車、大輪船、有軌電車、輕軌樣樣都搭過。仲見到馬車，同埋3個輪嘅的士，真系無奇不有。
交通：
1）飛機：上午11：10分飛機，到達青島下午14:10分，午餐飛機上解決。提前兩個幾星期訂，加上燃油、保險、機場稅RMB750大洋。
2）機場到市區：公交站點好多、taxi怕兜路，選擇機場快線比較踏實。機場快線售票點就響國內到達廳出門左手面，好容易搵到。701、702、703、青島金港飯店4部，半小時到1小時一班車，20人仔一個人。基本上都經過主要的鬧市區和景點，選酒店時候可以留意下。響托運行李提取點附近就有機場往來交通圖，有詳細的介紹
3）市內交通：基本上1蚊。但系站點非常亂。好似棧橋，響呢個點附近好多個站都叫“棧橋”，有D甚至隔兩三條馬路。青島好多路都系單行線，來回車站唔響對面。問路最好同人講自己想坐車去邊。如果就問“棧橋”，佢哋會隨便指你一個叫“棧橋”滴站，跟住就會不斷鬼打牆。GPS同指南針真系好有用。今次去冇指南針，剛好冇太陽，真系迷路小羔羊，行多好多冤枉路。
住宿：
本嚟想訂網上人氣頗高嘅劈材院星程特價房，可惜訂得太遲冇房。就響劈材院裡面，隨時都有嘢食，不過離海邊有一兩個站，響景點裡面唔知會唔會吵。網上裝修幾有特色，有機會可以試下。後來訂左都市118，前身系軍區招待所。訂呢家主要貪近火車站，步行3分鐘可以到，方便趕火車。138大洋3人家庭房，實惠。入住後發覺，超級近海邊和棧橋，1分鐘就可以行到。不過最困擾系熱水水壓比較低，衝涼唔過癮。而且隔條兩條馬路就有7天。
美食：
青島原漿啤酒啦，一定要試咯。比較失望系去左海島漁村，海鮮居然比廣州仲貴，而且出品一般，上菜比較慢。所在嘅雲霄路成條路都系海鮮大排檔，不妨試下其他。
仲有當然就系劈材院啦！裡面各式小食任君選擇。排骨飯、蛋蒸海膽、三鮮鍋貼、爆肚、烤魷魚、豆腐腦…………
景福宮韓食料理，香港中路。逛完八大關就坐車3個站就到。因為靠近南韓，呢邊餐廳好多韓國主廚，單人套餐大概70人仔，有烤魚、大醬湯、米飯等，8小碟前菜肯定會有啦。味道嘛，OK。環境就真系比較一般，不過服務好好。
靚景
青島真系靚到冇朋友，行道邊都系一幅色彩斑斕嘅畫。
棧橋
一條直路延伸到慢慢大海中，壯觀！配上藍天上飛逸嘅白雲，美不勝收。不過每天行過都人頭湧湧。棧橋旁就系一處海灘。棧橋後手邊可以睇到軍事博物館嘅軍艦以及小青島。青島雲好美妙，隨風流動速度好快，高樓成日被白雲環繞，上面嘅人應該覺得響仙境咁吧！
天主教堂，可惜裝修中
劈材院
如其話系景點，不如話系美食坊實際D。
總督府
第二日一早就出發去總督府，去到附近問左好多當地人都唔知呢個地方。後來問左D巡警，原來已經變成政府辦公大樓。旁仲有個熱鬧而地道嘅集市。
基督教堂
順住總督府行，好快見到基督教堂。估計去得太早，仲未有人收門票，省翻10蚊。不過已經有好多新人派緊婚紗照，占盡所有影像靚位。
迎賓館
9點先開門，門票，冇入去。從外圍系見唔到棟樓的
中國海洋大學
順住迎賓館旁邊小路行，經過一個住宅區，就到中國海洋大學。選擇呢到行，系唔想上信號山公園，懶得爬山。海洋大學裡面大樓都頗具歐陸古典風格，從運動場上仲可以見到信號山公園上面著名嘅紅色小球觀景台同埋迎賓館添。
第一海水浴場
海洋大學行出黎，順住落山就系第一海水浴場啦，絕對系一個秒殺SIM卡內存嘅地方。海水清，海天一色。向遠處眺望，可以見到萬噸貨輪。咁樣嘅景像對於南方未見到大海嘅娃，真系奇觀。可惜6月底依然未可以落水，好凍。浴場右手面有一棧道，風景好好。隨住行可以去到魯迅公園，圍牆外就系海底世界。浴場艷陽高照，不知不覺就會變現代包公。
八大關
海水浴場向前走，右手面就系天泰體育館。響體育館同武勝關酒店之間嘅樓梯上去，就到萬國建築博覽嘅八大關。我嘅行程系順住韶關路行經過公主樓、第二海水浴場、花石樓再翻上去紫荊關路，最後去香港西路食韓國料理。公主樓兜兜轉轉搵左好耐，問左下當地嘅派婚紗照嘅攝影師，答案系已經變成肺病醫院。出汗！同樣，超級多長槍短炮嘅婚紗客，一波一波賺曬D靚位。相較於廈門鼓浪嶼，少了一份小資，卻多了一份寧靜。絕大多數建築都已經翻新，好多地方開發緊一棟棟新嘅別野。不禁擔憂呢到獨特嘅風景線仲可以維持幾耐。
奧帆中心黎
到呢樹就會明白點解青島叫做“東風瑞士”。蔚藍嘅天空、普照嘅陽光、純白嘅雲朵、密集嘅風帆游艇、一字排開嘅彩旗、醒目嘅奧運標志。除左路上行，可以選擇坐快艇、風帆、游船黎個海上到此一游。
五四廣場
奧帆中心就可以遠遠望到“五月的風”嘅雕像。鮮艷奪目嘅紅色，配上明亮嘅藍天，贊！廣場上好多人放風箏，熱鬧。路邊不時有老冰棍叫賣，1蚊1支。
青島火車站
呢度應該講系一個景點，漂亮嘅鐘樓和候車室依然保留舊時樣貌。偌大嘅候車室配上圓拱們和水晶燈，置身古堡嘅感覺。雖然建築有一定歲月，但系設備現代嘅。除人工售票廳，仲有自動售票廳。輕松一Du就可以買到飛，方便快捷。火車站右手面系聞名嘅海景M記，雖然近火車站，價格同其他一樣，24小時營業。海景要上2樓先睇到，2樓早餐時段都唔開。旁邊嘅KFC就系“特殊價位“啦，早餐要20幾蚊。火車站正對面仲有一家KFC，一樣24小時營業，正常價格的。
青島真系一個好贊嘅地方，海風好醒神。響呢D完全忘記工作嘅煩憂，除左擔心點行去坐車，哈哈。呢邊太陽公公特別精神，早上4點幾已經曬PetPet，晚上8點幾天黑。一日嘅時間覺得特別嘅漫長。就因為咁，第一日5點幾起身，居然都唔發覺。行道出街，先知道原來未夠6點。
今次青島留嘅時間唔長，就差嶗山冇去。其他第二日嘅景點基本都步行，真系好攰，沿途偶遇好多人好多景。青島花開得好靚，特別細玫瑰，惹眼嘅紅色環繞欄杆，覺得呢個城市更加可愛、更加令人動容！
未完待續……