話說1月13日晚我背上行囊，因兩地的溫差,為左著裝的問題糾結了一輪才踏著涼鞋趕去坐地鐵，順利到達機場剛好晚上9點，俾電話朋友蚊子，她才到火車站，太立了吧！在屏幕上查看到亞航班機櫃位就直接上去先， 好多人在排隊，我拿著打印好的登機牌上前問是否能直接登機？得到答案是要排隊換登機牌至得，暈，亞航呃稱，早知就唔辦咩網上值機啦！唯有老實排隊。其間再電聯蚊子，讓她直接過櫃位穩我。排隊時遇到一個人去曼谷的女仔，大家閑聊，她說是從浙江到廣州玩後再去曼谷玩，說有朋友在那邊，唉，有人接應真好，其實我呢個時候心裡還是7上8下的，兩條友都系第一次出國旅游，人生地不熟，又語言不通，各種的不可預見。。。唔諗了，咩都有第一次嘎啦！
換好登機牌，我地就去安檢，順利過關！我用水杯裝左熱水，准備上機飲，因為亞航呢程我地無買飛機餐，無辦行李托運，為了省下銀子，裸飛，哈哈~ 亞航出名摳門，連座位都特別狹窄，椅子還不能調整角度，Shit~老娘整個飛行過程都只能板直腰，在我們後面兩排的位置都無人坐，椅套是紅色的，特別寬松，原來是要另外加錢坐的，但直到降落都是空在那裡。哼，浪費資源！
到達曼谷廊曼機場已經是14號凌晨3點多，泰國時間比我地慢一個鐘，我將手機調好當地時間，手表就唔變。過左關後直接去的士站坐車，解釋左好耐，的士佬俾埋電話旅館先知道地點，上左車之後先覺得驚，因為架的士響馬路上飛馳左好耐都未到，但我手上Booking上的地圖顯示旅館離機場只有3公裡遠，果個司機會唔會系壞人呢？各種想法又衝曬出黎，只能叫自己鎮定D，蚊子比我更緊張，一味叫我問司機到未，我只能淡定甘同她講，到左自然會放低你，定D黎，呵呵，其實系我怕語言溝通失靈，問又會顯得自己膽小了。
終於到左目的地，車在一間小旅館前停下，俾左的士費加服務費175B，同司機講Thank You！切，俾人屈仲要賠笑臉。
旅館前台有一個阿姨坐著，我馬上拿著確認單過去，點知她一睇就話我訂的是明天的房間，不是今天的，狂暈，我大腦一下子蒙了，點會呢？我明明訂左14號的房間啊？蚊子即時話我計錯數啦，應該訂13號晚才對，我這時才回過神來，天啊，居然訂遲左一日。無辦法，只能問有無吉房，幸好阿姨話仲有間大床房，不過只有風扇，無曬空調房了。反正對付左今晚先就得啦，呢個時候，我心頭大石才得以放下，我仲要不失時機講下價，她爽快答應380B俾我地，其實原來訂時才500B，也不貴。不過住落先知，間房超級細，離隔車聲好吵，好似訓在路邊，整晚無眠，慘情。。。。
第二日一早起床，我地退左房，將之前訂的房間取消，不能再住呢度了。 行過7仔我辦左個Happy卡，聽講上網套餐幾抵，點知同店員溝通失靈，她只幫我充值左200B，我見可以上到網就以為OK了，後來查過先知她根本無幫我訂7日上網套餐，暈，不過之後6天時間，我打過一次電話回家，其余都用來上上QQ，剛好夠用，如果辦套餐肯定仲抵D。順便買左支牛奶和蛋糕做早餐（請注意呢種蛋卷出現頻率頗高，蚊子一路食到番廣州）
打的向考山路進發，路上不斷塞車，將近11點先到達考山路。行甘遠路車費才165B，想想昨晚肯定俾人昆左了，出來行，系要還的。
我地在考山路偶遇網上推薦的MAMA Tour，決定預訂之後兩天的行程，大城府一天和水上市場半天，咨詢過全部系英語導游，話中文導游太貴。。。溝通過後我地定左第一天早上7點直接到這裡等車，第二天因訂左旅館在中國城附近，讓他們來接送，要加多50B，每人交左900B搞掂（不過之後發生的事情令我對他們嚴重失望，仲話系網上推薦添，鄙視）。
訂左行程後，就在考山路附近先穩住地，本來睇左有間叫D&D的不錯，可惜只有大床房，我地唔想再同床啦，一次就足夠了，所以背著行李又再穩，人又困又餓，睇左幾間之後求其入住左間有雙床的House，600B一晚。設備陳舊，台又無，衣櫃都無，但勝在夠靜，居然最好訓系果晚了，可能太累啦。
安頓好之後，我地先去食野，各自打左杯石榴汁飲，在一條內街我想試下大排檔的滋味，於是同老板一番雞同鴨講後，我羅左一個糯米飯、雞塊同埋勁辣的街頭青木瓜沙拉食，蚊子居然話唔肚餓無食，唔通我大食積？？
食完飯我地就出發去附近的大皇宮了，曼谷真系曬，頂住烈日我地盲目甘亂行，雖然大皇宮就在馬路對面，但由於對路況不熟悉，我地在路上就遇到騙子啦，當我半信半疑同果條友“交流”左一番時，條友就俾個騎摩托車的警察勸說離開，然後差佬同我地講果D友仔系專門呃游客的，距會呃你話大皇室今日唔開，叫你去坐船之類，讓你消費更多，你地唔會理會距地。好彩，不過我之前在網上都睇到過類似騙局，肯定都唔會聽信他的咯，只系好奇而已。
大皇宮票價升左，每人500B。其實裡面好細，金壁輝煌，殘曬眼甘，以顯示尊貴，游客超多，尤其以中國人為主，我地中國同胞有的是Money~於是系甘影影影，搞掂走人。相片就唔再放，費事重復。
從大皇宮出來之後我地誤打誤撞行去旁邊的碼頭，見山竹賣，大大只才60B/1Kg（有呃稱成份），買左2斤在輪候處食。坐渡輪到對岸，才3B一個人，順便欣賞下湄南河兩岸風光，下一站應該是鄭王廟（又名黎明寺），但系過渡之後我地循著寺廟方向行，都找不到，眼看已到黃昏了，怕會關門，只能打部嘟嘟車前往，50B直達，門票50B/人，呢度果然好宏偉，中央的主塔高聳入雲,被幾座連住的副塔包圍，雕工精致，保存良好,無不透露著勞動人民的偉大智慧,樓級好高哇,睇見都腳仔軟，我地無爬上去塔頂，只在中層轉左一圈，影影影~可惜已近黃昏,要趕回去了。
番去附近的碼頭，在買票時遇到一個講普通話的女仔，也是一個人去曼谷旅行，已經行左好多地方了，她手中的攻略書很詳細，我地在渡輪上傾左一陣，落船後就道別，我太渴了，又買左支紅色的石榴汁飲，好好味，不過要40B，細細支，唔抵咯。行出碼頭對面就是臥佛寺，門票好像要100B，唔唔唔我地無入去，在門口的凳上稍作休息就坐的士番考山路了，用了60B，在曼谷還是打的有數圍，問過嘟嘟車居然開價200B，亂來的。
晚上想食地道泰國美食，入左考山路一間環境不錯的露天餐廳Tom Yum Kung，但出品一般，點左個冬蔭功湯和綠咖喱蝦試下，辣啊，蝦是急凍的，唔好食，But我都食左兩碗飯，飲左一大支7喜汽水，飽曬。呢餐算整個行程最貴既一餐，433.4B。呢度晚上仲有泰國傳統舞蹈表演，客人好少，搞到我地好似貴賓甘添，唔覺意升級左哈哈。
入夜的考山路超級旺，小食、衣服、飾品等小攤擺了一路，這裡以老外居多，轟隆隆的酒吧我地無興趣，早早番房衝涼訓，第二日7點要出發去大城府。晚上打完電話回家報平安，較好鬧鈴，訓到死豬般，呵呵。
第二日一早起床洗漱完Check out，寄存好行李就直奔對面7仔買水同早餐啦，又系果種蛋糕加明治乳酸飲品，特價才15B，雖然顯示話配美祿同價，但我地一路看過都缺這種小美祿，純粹忽悠人啦。行到去MaMa Tour門口，居然無開門，人影都無一只，睇時間未到，我地在門口食早餐、影下相，好快就到7：15，仲未見有車過來接，見有差佬經過上前咨詢下啦，他看過確認單就復我說你先等等啦，可能遲左姐，我地唯有繼續等咯，見識左泰國人幾甘唔准時！等到7點40分先有條女大叫“大城府”的譯音，我英文不靈光，未反應過來，遞上確認單，她看過說OK，我地就跟著走了，原來系豬仔團呢，除左我地，其他都是老外，頓時覺得自己似老外添，呵呵。
大城府一天游都幾值，來回車程要兩小時左右吧。我地去左幾個地方，都要坐車兜的，如果自己踩單車，唔知道方向都幾麻煩，加上中午實在太曬啦，跟團都算幾方便，雖然唔知果個泰國女仔導游解說講乜，但也算盡職盡責咯。不過中午果餐就食到我肚痾，慘~霍香正氣丸陪伴我整個旅程。
參觀完大城府車子下午4點左右回到考山路，我地回旅館取回行李打算打的前往之前訂好的旅館，叫River View的，點知截左三台的士都唔肯去，有台嘟嘟車就一直說服我地上距台車，話距識去，搞到D的士佬好似夾埋甘都唔肯載我地，無計，我地只好同果台嘟嘟車講價，從200B講到120B，上！點知上左車先後悔，條友開車無譜，亂甘衝亂甘穿，嚇到我冷汗都出埋，仲要話我地住得平，no money，切，你甘有錢唔使開車穩食啦~從此對嘟嘟車毫無好感，宰你沒商量，仲要唔安全，我地發誓打死都唔再坐嘟嘟車了。不過世事無絕對，我地仲系被逼坐左一趟。是在清邁去機場，也是後話啦。
落左車，再穿過一條巷子，到達第二站的旅館，辦理Check in後，我讓前台MM幫手聯系明天的導游，告訴對方House的地址好確認明早過來這裡接我地，點知在電話講左一大輪，對方要我地明天直接去考山路旅行社那裡等，唔接我地了，煩啊，最後傾到退番100B路費，間野好流啊！蚊子話回來要在網上唱衰距。但錢已經交左啦，我地無得Say No咯，只能明早自己打車去考山，預左100B的車費。安頓好後我地准備去市中心睇四面佛，在出發前我在電梯睇到介紹，好奇甘上左8樓的酒吧睇下，哇，呢度真系別有天地啊，眼前一片河景，波光粼粼，河面上有各種小艇穿流，兩岸的寺廟和建築在晚霞輝映中顯得特別漂亮，馬上相機出動，周圍影下先，又爬上天台參觀，仲話晚上回來可以享受下添，點知晚上逛得太夜無再上去了，人家11點關門啦，是為一大遺憾也。
根據House提供的地圖，我地順利行出馬路面截的士去市中心四面佛，開始講暹羅廣場司機唔識，最後都系講附近的Central world，明左，哈哈~曼谷的士司機好多都唔識英文，好容易就拒載，煩！所以酒店卡片一定要羅，有泰文和地圖就唔怕穩唔到啦！到左Central world附近，我地落車，行番轉頭，見路邊有香蕉餅賣又湊熱鬧買黎食，不過太多油唔好食既，之後又手痕買左舊榴蓮，提著去看四面佛，它的位置剛好在某酒店旁邊，路的轉角位，晚上氣氛很好，信眾們奉上串花和香火，大家都懷著誠心來拜拜，保佑各人健康、平安。呢度位置好找，離遠就望到啦。我地轉左一圈，發現都系以中國人居多，呃。。。可能D鬼唔多信呢D。
睇完四面佛，我地又往回走去Big C，好多小商販都沿著路邊擺開攤檔，有食有用有玩的，好不熱鬧，我地行到著名超市Big C，打算買D榴蓮干之類，但在水果檔面前就停下來不走了，這裡剛好做特價，榴蓮才250B一盒，芒果49B。。。仲有好多水果，我地因之前就在街邊買左榴蓮，但見甘平又唔“忍心”唔買喔，最後蚊子第二日早餐就是呢個了，哈哈~經過果汁櫃又買左一支火龍果汁和牛油果汁，35B一支，飲到第二日。。。貪過癮，然後買左包炸的榴蓮干62B，但無穩到脫水做法的，有點失望。。。最後再買左幾包冬蔭功湯料就撤了。今晚就水果大餐吧，呵呵！從Big C出來本來打算買只包填肚，點知人家收檔。最後只能在路邊買左兩只烤雞翅20B，打車番旅館飽餐水果和雞翅，呢餐就甘完成，不過食完榴蓮個胃頂住曬，唔多舒服，俾台空調吹住成晚訓唔好，嗚嗚嗚。
第二日一早起身肚痾，繼續食霍香。洗嗽執拾好行李6點30就落樓Check out，寄存行李後就打車去考山路，早上車子好順，司機又行左近路，去到才用了55B，想想又可以省下45B，旅行社唔接都好，哈哈~無計，全程都在計數，晚晚都要睇自己剩下幾多銀兩，然後第二日要用幾錢，窮游真苦哇~蚊子說我數學不好，所以她負責統計，我交錢或者收錢就是了。
在考山路經過7仔入去買早餐，牛角包12B，呢次到達MAMA已經開左門都無甘驚，坐著食早餐等車。無幾耐去水上市場的車就到左，坐前座的兩個帥哥是馬來西亞的，我旁邊的女仔是台灣來的，大家用國語聊了很多曼谷的見聞。最神奇系果個台灣女仔話從機場打車到考山路用了900多B，然後去大皇宮路上被人打劫，幸好有老外出手相助，無損失。。。我地暗自慶幸走到今天還算順利，然後大家又再談到各自的行程，同聲同氣溝通容易多了。
到左水上市場，司機又游說我地一人100B加多火車站市場（乍都乍）的行程，我地話下午要趕機去清邁就婉拒了，然後我地坐上小木船在河道裡穿梭，由一位阿婆掌舵，有點於心不忍之感啊。。。其他的船上有賣水果的、有賣粉面和工藝品的，加上游客的船只，熙熙攘攘，熱鬧非常，有些狹窄的河道居然是幾條船一起塞在那裡動不得，要靠大家禮讓，兩岸也是店家，商品都陳列出來，船只經過時可以砍價進行交易，好好玩。不過有些裝有馬達的機械船太霸道了，啟動時發出轟鳴和廢氣，與這個寧靜的河道格格不入。不過一早就聽說這個丹嫩沙多水上市場比較商業化，另一個保存了本地原始風味的叫安帕瓦水上市場只在周六日才開放，我地呢次因時間夾唔到，暫時無緣見識了。
游船45分鐘後，我地上岸，司機話俾1小時我地自由活動後回到下車的地方。我買左一斤紅毛丹50B，又試左河邊的魚旦粉40B，蚊子買左香料，睇左好多工藝品，但都唔算靚，無下手。行行下好快就夠鐘集合番曼谷了。居然我地系最遲上車的，只能逼在車頭，果個司機開著音樂，哼著曲把車開得飛快，泰國司機的車技真的甘掂？唔系高速都開到140，冷汗掂標。。。在車上我食左成袋紅毛丹，誇張啊，蚊子說無味無汁，我覺得還可以啦！有D似大荔枝，甘大個女，第一次食啊，土。。。
回到考山路解散，中午好鬼曬吖，同蚊子商量先打車到火車站，睇下有無去機場的火車，因為在網上查過有火車可以直達機場，不過因為唔清楚買票情況如何，所以還是要提前去果度打探清楚車次先，如果可以就先訂左票再番旅館羅行李，反正火車站離House唔遠。打的去到火車站65B車費，了解左有班車去廊曼機場，羅左列車時刻表，大概每個鐘有一班車經廊曼。售票員要我地提前一小時過來買票就得，現在無票賣。於是我地又馬不停蹄行番House取行李，呢個過程比較復雜，因為唔識路，又想省點車費，甘近打的無數圍啊，拿著House提供的地圖邊走邊問人，經過7仔入去買蘆薈汁解渴，嚴重脫水的感覺。其實拿著地圖比對，好快就行番去了，真系唔遠咯。所以我決定步行番火車站唔打車，蚊子一臉痛苦，埋怨說行李太重，但為左省錢，無辦法，她只能硬著頭皮跟！呵呵！徒步才是窮游的精粹啊~
3點鐘左右我地回到火車站，買好16點10分的車票，只要5B一位，超級便宜啊！售票小姐仲對我的驚訝報以友善微笑，首次感覺泰國甘抵玩呢！火車站人唔多，有空調，候車區有位坐，大屏幕實時報站，與廣州火車站相比真系有很大區別，起碼人家的地方唔會甘臭。行去旁邊的KFC買左對雞翅和沙拉食，雞翅同國內的做法唔同，深色的、好辣、好鹹，沙拉不錯，有吞拿魚在裡面，食完仲想食啊~
睇到大屏幕預報後，我地提前15分鐘上車啦！不過，好似太准時唔符合泰國人風格。列車有點像天朝的綠皮車，車內是簡單整潔的奶黃色木條凳，好像回到80年代，有復古的感覺，哈哈，我地上左車一陣猛影。等到成4點半火車才慢慢開出，然後仲要停下來檢票，急得蚊子直叫後悔，怕我地真的會趕唔切坐飛機，呵呵！但都已經上左車了，無得後悔啦，唯有耐心等，網上都話火車晚點是常事，蚊子話早知我地就訂15：20果趟，有早知無乞衣啦！世事兩難全，正如你選擇平價火車，就要忍受它慢這一點，如果要快就打的，不過就要付出更多的錢咯。其實，如果悠閑游的話，在曼谷坐火車會是不錯的選擇，整個泰國，陸路運輸最平的可能只有火車了，在中國都無甘平的價錢，數數有成10站，才收5B，偷笑啦~幸好火車後來都正常番，越開越快，到達廊曼機場才17：25，比預計時間遲左不夠半小時，算是俾面了，哈哈~
落左火車，穿過呢條似曾相識的《泰囧》拍攝外景走廊就到達廊曼機場啦~
到機場後由於我地無須托運行李，辦左自助登機直接打印登記牌可以去安檢了，效率真是高，對比國內的復雜程序真是@#￥%&*！過左安檢就就見到7仔，我買左牛角包同豆奶做晚餐。
在去候機室的路上我地遇到一個香港女仔，她主動同我地打招呼，傾左陣，她獨自一人來泰國旅行，下一站去柬埔寨，對獨行者我都心表佩服啊，何況系女仔添~原來我地晚上訂的酒店很近，她約定落機後Join埋我地一起打車去酒店，大家Share，可以慳錢我地肯定無問題啦，哈。廊曼機場的空調好似唔使錢甘猛開，在候機室凍到雪條甘，雖然我加左披肩、著住長袖衫。。。食左包飲左奶才有點能量補充，因短途機，呢程都無訂飛機餐。終於等到7點鐘可以登機了，曼谷886，清邁俺來嘍。。。
下集清邁篇，敬請期待~